اقرأ فى موقع حياتها
1- قصة مؤثرة واقعية
مرة واحدة صاحبتي كانت بتكلمني وهي منهارة حرفياً وبتحكيلي قد ايه هي تعبت وملت من كل حاجة في حياتها اللي بقت روتينية ومحصورة في حاجات يومية محددة انها تصحي الصبح تحضر الفطار وسندويتشات الولاد وقهوة زوجها وتصحي الزوج يفطر و في الوقت اللي هي بتكون بتصحي الاولاد وتلبسهم وتحضرهم علشان المدرسة والزوج يفطر وينزل وهي تلبس وتنزل بعده تودي الاولاد المدرسة وتروح على شغلها وترجع من شغلها ع السوق والسوبر ماركت وبعدين تجيب الولاد من المدرسة وتروح جري ع المطبخ بهدومها.
2- رحلة عذاب
تبدأ في تحضير الغدا وفي نفس الوقت بتسمع شكاوي كل واحد من اولادها عن يومه في المدرسة بالتفصيل الممل ولازم تنصت كويس لهم وتاناقش وتحاور وبرده وهي بهدومها بتحضر الغدا وبعدها الاولاد يبدأوا في عمل الواجب وهي بتساعدهم بطريقة الجري يعني تجري من المطبخ للاولاد للغسيل لتوضيب اليبت كله كله بالجري…
3- الاستعداد للقاء المنتظر
خلاص الوقت عدى وزوجها قرب يرجع البيت تجري تغير وتحط كحل وروج خفيف وترش شوية بيرفم علشان شكلها يكون كويس قدامه وهوب زوجها يوصل البيت تقابله بابتسامه رغم كل اللي فيها وتساعده في تغيير هدومه وتجري تحضر الغدا علي السفرة وهم ع الغداء عنيها علي معلقة زوجها المحملة بالاكل وبتترفع من الطبق لفمه ومستنية يقولها رأيه ويكون الصمت هو الإجابة وهو الرأي اللي بيقوله الزوج عن الأكل وتحاول تكسر الصمت دا وتسأله عن رأيه يرد ويقول طالما باكل ومش علقت يبقي كويس!
4- حوار ساخن
= نعم حضرتك؟؟؟؟؟ تقصد ان التعليق يكون في حالة ان الأكل مش كويس بس؟؟؟؟؟ بس طبعا بتقول كدا في سرها
بعد الغدا يقوم الاولاد يكملوا مذاكرتهم والزوج يقوم يمدد شوية لانه راجع من شغله تعبان !!! وهي تدخل المطبخ وتكمل باقي مهامها بين المطبخ ومتابعة الاولاد ونشر غسيل او تطبيقه او اي حاجة محتاجها البيت وشوية تحضر الشاي والزوج يصحي يشربه وينزل يروح عن نفسه شوية مع اصحابه لانه زهقان !!!!! ويسيبها برده في البيت بتكمل يومها في الجري
5- نقاش حاد
الحمدلله الاولاد خلصوا وناموا والمهام الهزلية اليومية خلصت ولسة هتقعد ترتاح يرجع زوجها من برة ويقولها حضريلي العشا
= حاضر بس ارتاح شوية وهقوم
ترتاحي؟؟؟ من ايه؟؟؟ هو انتي اصلا بتعملي ايه طول اليوم؟؟؟
سمعت الكلمة دي وكان مية باردة وقعت عليها و كانت بمثابة القشة التي قطمت ضهر البعير
6- مواجهة ساخنة
= نعم؟؟ بعمل ايه؟؟ لا اقولك بعمل ايه علشان تعرف طالما انك مش شايف ولا حاسس.
انا بعمل أم وأب ومدرسة ودكتورة واخصائية نفسية واجتماعية بحل المشاكل وافض الخناقات بين أولادك وبعمل خدامة وطباخة دا طبعا غير شغلي اللي بروحه كل يوم واتقي ربنا فيه علشان ربنا يباركلي في عيالي . عرفت بعمل ايه طول اليوم؟؟؟
قولي انت بقي بتعمل ايه طول اليوم؟؟ بتصحي تاكل وتنزل شغلك وترجع تنام وتصحي تخرج لصحابك وترجع عايز تتعشي ومش عجبك اني بقولك ارتاح شوية؟؟
7- طلاق عاطفى
ساد حالة من الصمت وبعدها زوجها سابها ودخل ينام من غير مايرد عليها بكلمة!!!
عارفين كانت منهارة وتبكي بحرقة وبتفكر تسيب البيت حتي لو وصلت للطلاق ليه؟؟ مش علشان تعبت من اللي بتعمله كل يوم ، لاء ، اللي تعبها بس جملة انتي بتعملي ايه طول اليوم؟؟؟؟؟؟
عارفين هي كانت محتاجة ايه؟؟ كانت محتاجة كلمة حلوة يقولها زوجها يطبطب بيها علي روحها
مش كان هيخسر حاجة لو قالها علي الغدا تسلم ايديكي
او لما جابتله الشاي لما صحي يقولها ربنا يخليكي ليا
او بدل ما ينزل لصحابه كان قعد يتابع اولاده معاها
او حتي كان جاب عشاء معاه من بره وهو راجع وقالها عارف انك تعبتى فقولت نتعشا سوا مع بعض
او اضعف الايمان لما طلب العشاء وقالتله هرتاح شوية كان قام حضر سندويتش وكوباية شاي وقالها كلي الاول معايا وبعدين نامي
او حتي بعد ما قالتله كل الكلام اللي قالتهوله كان خدها في حضنه وقلها اي كلمة حلوة
شوفتوا الموضوع بسيط ازاي وحله كلمة حلوة؟؟؟
8- رسولنا – صلى الله عليه وسلم – هو القدوة:
يامعشر الرجال تخلوا شوية عن ذكورتكم واستحضروا رجولتكم واتبعوا قول رسولنا الكريم ” استوصوا بالنساء خيرا، فإنهن خلقن من ضلع أعوج ”
” خيركم خيركم لأهله وانا خيركم لأهلي “
